Femínistar fagna dræmri sölu á Barbie dúkkum

„Ég fagna samdrætti í sölu á Barbie dúkkum," segir Guðný Gústafsdóttir, talskona femínista, en sala á Barbie dúkkum í Bretlandi hefur dregist saman um 42 prósent á árinu samkvæmt breska blaðinu Guardian. Dúkkan fagnar fimmtugsafmælinu sínu í ár og svo virðist sem plastfegurðin hafi fölnað því Barbie hefur vissulega munað fífil sinn fegurri.

Þá skiptir engu að eigendur Barbie, leikfangafyrirtækið Mattel, hefur splæst í lýtaaðgerðir handa dúkkunni. Nú státar Barbie ekki bara örmjóu mitti og lögulegum línum heldur einnig skarpari kjálka, möndlulegri augu og þrýstnari varir.

„Kannski er jafnréttisbaráttan farin að hafa áhrif, það væri allavega óskandi," segir Guðný en Barbie hefur lengi verið þyrnir í augum femínista þar sem dúkkan þykir ekki eingöngu gefa brenglaða mynd af útliti kvenna heldur stendur hún fyrir staðalímynd sem femínistum hugnast alls ekki.

Guðný segir að svo virðist sem konan sem kyntákn sé að hopa en sjálf óttast hún að þá verði lögð mun meiri áhersla á ummönnunarþáttum konunnar.

„Kreppunni fylgir bakslag í jafnréttisbaráttunni. Nú er lögð meiri áhersla á móðurhlutverkið heldur en kyntáknið," segir Guðný og bætir við að frá eigin reynslu þá sýnist henni eins og það sé meira lagt upp úr dúkkufötum og leikföngum eins og Baby Born heldur en oft áður.

Í grein Guardian kemur fram að kreppan hafi haft áhrif á sölu Barbie dúkkunnar og vill einn leikfangaframleiðandinn meina að versnandi efnahagur hafi fært fólk fjær glysheimi Hollywood sem Barbie stendur fyrir.

Þá kemur einnig fram í greininni að foreldrar virðast fjárfesta frekar í gömlum klassískum leikföngum eins og Lego og Playmobil. Þá hefur leikfangasala í Bretlandi dregist saman um 10 prósent.

Guðný segir það óskandi að jafnréttisbaráttan sé farin að hafa svo víðtæk áhrif að foreldrar kaupi ekki lengur dúkkur eins og Barbie fyrir dætur sínar. „Sú tilgáta væri náttúrulega draumur allra femínista," segir Guðný að lokum.