Orkuveitan í ruslflokk

Lánshæfiseinkunn Orkuveitu Reykjavíkur hefur verið lækkuð hjá matsfyrirtækinu Moody's og er nú í svokölluðum ruslflokki. Þetta kemur fram í Morgunblaðinu í dag.

Fyrirtækið er nú í flokknum Ba1 en var áður í Baa1. Lækkunin er sögð fylgja í kjölfar þess að Moody's ákvað í gær að lækka lánshæfi ríkissjóðs Ísland um einn flokk. Guðlaugur G. Sverrisson, stjórnarformaður Orkuveitunnar segir í samtali við blaðið að opinber fyrirtæki séu alltaf einum flokki fyrir neðan viðkomandi ríki og því hafi ruslflokkurinn verið óumflýjanlegur.

Annarsstaðar í blaðinu segir hins vegar frá því að lánshæfiseinkunn Íbúðalánasjóðs og Landsvirkjunnar hafi einnig verið lækkuð um einn flokk og eru þau nú líkt og ríkissjóður einu stigi frá ruslflokki.