Týndu skuldabréfin skráð á heimasíðu skilanefndar Glitnis

Skuldabréfin sem upphaflega voru sögð týnd hjá skilanefnd Glitnis voru skráð á heimasíðu skilanefndarinnar á lista yfir skuldabréf bankans í heild frá 26. október síðastliðinn, tæpum tveimur vikum fyrir kröfuhafafund þar sem tlkynnt var um bréfin.

Hægt er að sjá bréfin á þessum lista frá 26. október á heimasíðu skilanefndar. Slóðin er: http://www.glitnirbank.com/images/stories/MasterListofGlitnirISINS-102609.pdf

Umrædd bréf eru þrjú talsins upp á 250 milljónir evra hvert og eru skáð í 7. til 9. neðstu línurnar á listanum.

Skilanefnd Glitnis hefur sent frá sér yfirlýsingu vegna málsins sem hljóðar svo:

„Vegna frétta fjölmiðla síðustu daga um liðlega 750 milljóna evra misræmi sem fram kom við afstemmningu á bókhaldi Glitnis nýverið og sem greint var frá á fundi með kröfuhöfum í síðustu viku, vill skilanefnd Glitnis taka fram:

Þetta mál er nú til skoðunar hjá endurskoðunarfyrirtækinu Deloitte en ekki hjá fjármálarannsóknafyrirtækinu Kroll, enda er ekkert sem bendir til á þessari stundu að misræmið tengist ólögmætum aðgerðum.

Umrætt misræmi kom fram við afstemmningu á bókhaldi Glitnis við utanaðkomandi aðila, en sú vinna fer nú fram hjá Glitni og er liður í undirbúningi slitastjórnar og skilanefndar áður en tekin verður afstaða til krafna í bú Glitnis. Frestur til að lýsa kröfum í búið rennur út þann 26. nóvember næst komandi. Ekki er því um það að ræða að komið hafi í ljós ný krafa á hendur bankanum frá einhverjum einum aðila eins og ranglega hefur verið haldið fram í einstaka fjölmiðlum.

Skilanefnd Glitnis mun greina frá niðurstöðu Deloitte um leið og hún liggur fyrir.

Fh. skilanefndar Glitnis

Árni Tómasson"