Verðbólgan sem fyrr mest á Íslandi

Verðbólgan á Íslandi lækkaði úr 13,8% í 12,4% milli október og nóvember síðastliðinn samkvæmt samræmdri vísitölu neysluverðs. Af ríkjum evrópska efnahagssvæðisins er verðbólgan, sem fyrr, langmest hér á landi.

Fjallað er um málið í Morgunkorni greiningar Íslandsbanka. Þar segir að verðbólgan mælist næst mest í Ungverjalandi (5,2%), svo í Rúmeníu (4,6%) og þar á eftir Póllandi (3,8%). Að meðaltali er verðbólgan nú um 1,1% meðal ríkja EES en um 0,5% innan ríkja evrusvæðisins.

Þeim ríkjum sem eru að upplifa ástand verðhjöðnunar fækkaði á milli október og nóvember en eins og kunnugt er hafa mörg ríki innan Evrópu verið að upplifa slíkt ástand á undanförnum mánuðum. Verðhjöðnun fer gjarnan saman við samdrátt og vaxandi atvinnuleysi líkt og verið hefur víða í Evrópu. Enn er verðhjöðnunin mest á Írlandi, eða um 2,8%, en þar í landi hefur verið mikill samdráttur í landsframleiðslu, auk þess sem atvinnuleysi hefur farið hratt vaxandi. Það var Hagstofa Evrópusambandsins sem birti tölur um þetta nú í morgun.

Stærsti munur samræmdrar vísitölu neysluverðs og þeirrar vísitölu sem hér á landi er almennt notuð sem mælikvarði á verðbólgu, myndar viðmið verðbólgumarkmiðs Seðlabankans og Hagstofan reiknar er að íbúðaverð er ekki tekið beint inn í samræmdu vísitöluna.

Að undanförnu hefur íbúðaverð lækkað töluvert og mælist verðbólgan því nokkuð hærri samkvæmt samræmdri vísitölu neysluverðs en hinni hefðbundnu. Samkvæmt þeirri síðarnefndu mældist verðbólgan í nóvember 8,6% sem er um 3,8 prósentustigum lægri en miðað við þá samræmdu. Að húsnæði undanskildu mældist verðbólgan hins vegar 12,5% sem er nánast sama gildi og verðbólgan samkvæmt þeirri samræmdu.