Icelandair dettur út úr úrvalsvísitölu kauphallarinnar

Ný samsetning OMX Iceland 6 vísitölunnar tekur gildi 4. janúar 2010 en breytingin á vísitölunni felst í því að Icelandair detttur út og Atlantic Airways kemur inn í staðinn.

Í frétt frá kauphöllinni um málið segir að vísitalan sé endurskoðuð tvisvar á ári. Hún inniheldur þau sex félög á aðalmarkaði sem mest viðskipti eru með.

OMX Iceland 6 vísitalan er Úrvalsvísitala kauphallarinnar. Vísitalan hentar vel sem grunnur fyrir fjármálagerninga af ýmsu tagi og sem viðmiðunarvísitala fyrir sjóði. Vægi félaga í OMX Iceland 6 vísitölunni ræðst af flotleiðréttu markaðsvirði og er samsetning hennar endurskoðuð tvisvar á ári, að því er segir í tilkynningunni.

Eftirfarandi samsetning OMXI6 vísitölunnar verður sem hér segir: Atlantic Petroleum, Bakkavör, Føroya Banki, Marel, Atlantic Airways og Össur.