Umfjöllun: Slavica með stórleik og sigurkörfuna í toppslagnum

Haukar komust á topp Iceland Express deildar kvenna í körfubolta eftir 76-73 sigur á Hamar í toppslag deildarinnar á Ásvöllum í kvöld.

Slavica Dimovska átti frábæran leik í liði Hauka, skoraði 38 stig og gerði síðan út um leikinn á æsispennandi lokasekúndum með ótrúlegri sigurkörfu langt fyrir utan þriggja stiga línuna.

Leikurinn var sveiflukenndur og spennuþrunginn og bæði lið sýndu á sér ýmsar hliðar. Liðin náðu bæði góðu forskoti í leiknum en misstu það niður. Haukar voru þannig 15 stigum yfir í 1. leikhluta (28-13) en Hamar náði að minnka muninn niður í 2 stig fyrir hálfleik (44-42) og var síðan komið 8 stigum yfir í 3. leikhluta (48-56).

Lokamínúturnar voru síðan æsispennandi eftir að Haukar höfðu skorað 9 fyrstu stig fjórða leikhlutans og komist yfir í 68-65. Annar góður sprettur og sex stig í röð komu Hamar yfir í 70-73 en þá var komið að þætti Slavicu.

Hamar var þremur stigum yfir þegar 23 sekúndur voru og Haukar tóki leikhlé. Hamar lokaði á þriggja stiga skot frá Slavicu sem átti þá stoðsendingu á Kristrúnu Sigurjónsdóttur sem jafnaði leikinn með þriggja stiga körfu þegar 12 sekúndur voru eftir.

Slavica stal síðan boltanum af Lakiste Barkus þegar sex sekúndur voru eftir brunaði fram og setti niður þriggja stiga körfu um leið og leiktíminn rann út. Slavica tók skotið mitt á milli miðju og þriggja stiga línunnar.

Slavica Dimovska átti frábæran leik í liði Hauka og var með 38 stig, 7 fráköst, 6 stoðsendingar og 4 stolna bolta. Ragna Margrét Brynjarsdóttir var líka mjög sterk undir körfunni með 10 stig og 13 fráköst og fyrirliðinn Kristrún Sigurjónsdóttir setti síðan niður risastórt skot í lokin eftir að hafa verið lítið áberandi fram að því.

Hjá Hamar voru erlendu leikmennirnir, Lakiste Barkus (20 stig, 5 stoðsendingar) og Julia Demirer (19 stig, 14 fráköst, 4 varin) í aðalhlutverki en Fanney Lind Guðmundsdóttir og Hafrún Hálfdánardóttir voru bestar af íslensku stelpunum.



Haukar-Hamar 76-73 (44-42)

Stig Hauka:

Slavica Dimovska 38 (6 stoðs., 4 stolnir), Ragna Margrét Brynjarsdóttir 10 (13 frák.), Guðbjörg Sverrisdóttir 8, Kristrún Sigurjónsdóttir 7, Telma Björk Fjalarsdóttir 7 (7 frák.), Helena Hólm 4, María Lind Sigurðardóttir 2.

Stig Hamars:

Lakiste Barkus 20 (5 stoðs.), Julia Demirer 19 (14 frák., 4 varin), Fanney Lind Guðmundsdóttir 8, Hafrún Hálfdánardóttir 8, Jóhanna Björk Sveinsdóttir 7, Íris Ásgeirsdóttir 6, Dúfa Dröfn Ásbjörnsdóttir 5.