Segir ummæli formanns SVÞ vera sérlega meiðandi

Friðrik J. Arngrímsson, framkvæmdastjóri LÍÚ, segir í bréfi til Hrundar Rudolfsdóttur, formanns Samtaka verslunar og þjónustu (SVÞ), sem sent var fyrir stuttu að fullyrðingar hennar um að LÍÚ hafi reynt að hindra lýðræðislega umræðu innan Samtaka atvinnulífsins séu „sérlega meiðandi."

Fjallað er um málið á vefsíðu LÍÚ. Þar segir að í niðurlagi bréfsins segir Friðrik orðrétt: „Það er óásættanlegt að formaður SA skyldi ekki verða við þeirri beiðni þriggja stjórnarmanna að afgreiða málið í stjórn þar sem öll aðildarsamtök Samtaka atvinnulífsins eiga fulltrúa eða áheyrnarfulltrúa enda brýtur það gegn samþykktum samtakanna.

Það er jafnframt afar sérstakt að formaður og framkvæmdastjórn Samtaka atvinnulífsins skyldi hafna beiðni okkar um að aðildarfyrirtæki SA verði spurð um afstöðu þeirra til einhliða upptöku annars gjaldmiðils án inngöngu í Evrópusambandið. Þá finnst mér það ekki lýsa sérstaklega mikilli lýðræðisást að ekki megi spyrja aðildarfyrirtæki SA um það hvort þau vilja að SA beiti sér fyrir inngöngu í ESB þrátt fyrir að það þýði afsal á yfirráðum yfir fiskimiðunum við Ísland eins og við fórum fram á."