Mosaic leitar að flóttaleið frá brunaútsölunni á eigum Baugs

Mosaic Fashions, eitt af félögunum í eignasafni Baugs í Bretlandi leitar nú að flóttaleið frá brunaútsölunni á eignum Baugs. Þetta kemur fram í blaðinu The Times í dag.

Mosaic, sem stendur á bakvið Oasis, Warehouse, Karen Millen og fleiri, greindi frá því í gærdag að félagið ætti í viðræðum við ýmsa aðila með langtímafjárfestingu í huga.

Times segir að einn þessara aðila sé fjárfestingarsjóðurinn Alchemy sem er í eigu Jon Moulton. Raunar hafi Alchemy einnig átt í viðræðum við House of Fraiser á svipuðum nótum.

Einn viðmælenda Times segir að allir séu að tala við alla í augnablikinu. Staðan sem upp sé komin sé án fordæma.

Derek Lovelock forstjóri Mosaic Fashions staðhæfir í samtali við Times að félagið þurfi ekki á björgun að halda en þurfi að hugsa um langtímahagsmuni sína.

"Enginn gat séð fyrir núverandi stöðu á Íslandi og stjórn okkar er að skoða ýmsa möguleika á langtímafjármögnun til að vernda merki okkar og starfsfólk," segir Lovelock. "Við vinnum þetta í náinni samvinnu við félaga okkar í Baugi og höfum rætt við nokkra aðila. Hinsvegar er engin niðurstaða komin enn."