Fulltrúadeild samþykkir aðstoð til bílarisa

Samþykkt var í fulltrúadeild Bandaríkjaþings í gærkvöldi að veita General Motors, Ford og Chrysler 14 milljarða dollara aðstoð úr ríkissjóði Bandaríkjanna.

Upphaflega fóru forsvarsmenn fyrirtækjanna fram á að aðstoðarféð yrði 34 milljarðar dolla. Atkvæði féllu svo, að 237 þingmenn samþykktu aðstoðina en 170 voru henni mótfallnir og voru þeir flestir úr röðum repúblikana. Þessi andstaða repúblikana gæti nægt til að fella frumvarpið í öldungadeild þingsins, þrátt fyrir að Bush forseti styðji það.