Ísland fær aðgang að 25 milljarða evra neyðarsjóði ESB

Ísland mun fá aðgang að sérstökum 25 milljarða evra, eða tæplega 4.000 milljarða króna, neyðarsjóði Evrópusambandsins. Þetta kemur fram í frétt á fréttavef breska blaðsins Times.

Þessi sjóður var nýlega tvöfaldaður upp í fyrrgreinda upphæð en öll lönd innan ESB, sem og "valin nágrannalönd" eins og það er orðað hafa aðgang að sjóðnum.

Fram kemur á vef Times að fram að þessu sé Ísland eina nágrannalandið sem kost eigi á að aðstoð úr sjóðnum en verið sé að athuga umsóknir frá öðrum löndum eins og t.d. Úkraínu.

Jose Manuel Barroso, forseti framkvæmdastjórnar ESB, segir að ESB sé reiðubúið að veita aðildarlöndum sínum sem eiga í erfiðleikum með að ná endum saman verulega fjárhagsaðstoð.

Reiknað er með að stjórn ESB muni setja fram áætlun um aðgerðir á vegum sjóðsins í næsta mánuði. Segir í fréttinni að aðgerðaáætlun til skamms tíma eigi að liggja fyrir þann 26. nóvember.