Krónan veldur usla í netbókunarkerfi SAS

Það er víðar en á Íslandi sem íslenska krónan veldur usla. Þannig segja norrænir miðlar frá því að SAS-flugfélagið hafi ekki getað selt flugmiða frá Íslandi til Noregs að undanförnu vegna bilunar í netbókunarkerfi.

Á vef Verdens Gang kemur fram að verðið á flugmiðunum sé gefið upp í norskum krónum sem sé umreiknað eftir gjaldeyrisskráningu hjá bankanum DNB. Sá banki færir hins vegar ekki lengur gengi krónunnar vegna óvissunnar í íslenska efnahagslífinu og því varð netbókunarkerfið látið reikna verðið á flugmiðunum frá Íslandi í evrum.

Þar urðu einhver tæknileg mistök því miðaverðið reyndist aðeins þriðjungur af því sem það átti að vera, 225 krónur norskar í stað 665 króna aðra leiðina.

Þær upplýsingar fengust hjá SAS á Íslandi að búið væri að laga villuna sem upp hefði komið en þar á bæ hafa menn orðið varir við aukinn áhuga Norðmanna á að koma hingað á síðustu misserum.