Þyrlur, bátar og flugvél taka þátt í leit að flugmanni

Björgunarþyrla og leitarflugvél frá Landhelgisgæslunni leita nú að manninum sem var í tveggja hreyfla Cessnu sem steyptist í hafið um 50 mílur vestur af Keflavíkurflugvelli. Von er á bátum og annarri þyrlu til leitarinnar.

Þær upplýsingar fengust hjá Landhelgisgæslunni að vélin hefði farið í sjóinn rétt fyrir klukkan hálffimm en neyðarkall barst frá henni fyrir fjögur í dag. Tilkynnti flugmaðurinn að drepist hefði á öðrum hreyflinum og hann ætti í erfiðleikum með að flytja eldsneyti á milli tanka. Að sögn Hrafnhildar Stefánsdóttur, upplýsingafulltrúa Flugstoða, var vélin á leið frá Grænlandi til Keflavíkur og virðist sem hún hafi orðið eldsneytislaus eftir þessi vandræði.

Þær upplýsingar fengust hjá Gæslunni að neyðarsendir vélarinnar hefði ekki fundist. Von er á björgunarbátum frá suðvesturhorninu til leitar á svæðinu og þá munu fiskiskip sem stödd voru á þessum slóðum taka þátt í leitinni. Enn fremur fer önnur þyrla á vegum Landhelgisgæslunnar að leita mannsins.