Hrun AIG getur valdið alvarlegum dómínó-áhrifum

Ef tryggingarfélagið AIG verður gjaldþrota gæti slíkt valdið alvarlegum dómínó-áhrifum um allan heim. Þetta kemur fram í úttekt um málið á Bloomberg-fréttaveitunni í dag.

AIG á í verulegum erfiðleikum þessa stundina og sárvatnar fjármagn af stærðargráðunni 40 til 75 milljarða dollara eða allt að rúmlega 6750 milljarða kr. AIG hefur farið fram á 40 milljarða dollara neyðarlán hjá Seðlabanka Bandaríkjanna og á í samningaviðræðum um 70 til 75 milljarða dollara lán hjá Goldman Sachs og JP Morgan.

Það bætti ekki ástandið að bæði Moody´s og Standard & Poors hafa lækkað lánshæfismat AIG um þrjá flokka niður í A-. Þessi lækkun að sögn Bloomberg er síðasti skjálftinn af mörgum sem skekið hafa fjármálaheiminn vestanhafs að undanförnu.

Boomberg segir að lækkunin á lánshæfismati AIG geti valdið því að lánadrottnar innkalli strax 13 milljarða dollara af skuldum AIG og auki þar með gífurlega hinn mikla þrýsting sem þegar er á stjórn AIG að leysa lausafjárvanda félagsins.

Sem stendur ber AIG ábyrgð á tryggingum á lánum að upphæð 441 milljarður dollara og ef félagið fer á hausinn eru þessar trygginar og lánin í uppnámi. Slíkt gæti skapað fyrrrgreind dómínó-áhrif.

Hlutabréf í AIG hafa verið í frjálsu falli undanfarna daga og eru komin niður í rétt rúma 2 dollara eftir að þau féllu um 61% í gær. Frá því að undirmálslánakreppan hófst hefur AIG tapað 93% af markaðsvirði sínu.