Franski fjárhættumiðlarinn látinn laus

Verðbréfamiðlarar aðvöruðu franska stórbankann Société Générale við verðbréfamiðlaranum Jérome Kerviel löngu áður en hann var stöðvaður. Engar haldbærar skýringar hafa fengist á því hvers vegna bankinn treysti manninum fyrir mörgum þúsundum milljarða króna. Talið er að Kerviel hafi fjárfest fyrir fimmtíu milljarða evra eða 5000 milljarða íslenskra króna án leyfis áður en upp komst um verk mannsins.

Dómari hefur ákveðið að vísa frá alvarlegustu kærunum á hendur Kerviel, um fjársvik og láta hann lausan eftir tveggja daga gæsluvarðhald og stöðugar yfirheyrslur lögreglunnar. Eftir standa kærur vegna misnotkunar og fölsunar á gögnum. Kerviel hefur viðurkennt að hann hafi reynt að leyna millifærslum sem þýddu tap upp á að minnsta kosti fimm milljarða evra eða tæpa 500 milljarða íslenskra króna fyrir Société Générale.