Hvíta húsið skammar OPEC

Bandarísk stjórnvöld segja þá ákvörðun OPEC ríkjanna að draga úr olíuframleiðslu markaðsfjandsamlega. OPEC, samtök olíuframleiðsluríkja, ákváðu á fundi sínum í Vín í gær að draga úr olíuframleiðslu um sem nemur 1,5 milljónum tunna á dag til að stemma stigu við lækkandi olíuverði. Tunnan fór hæst í 147 dollara í sumar, en hefur vegna minnkandi eftirspurnar undanfarið lækkað töluvert í verði, og er nú komin niður í rúman 61 dollar.

Reuters hefur það eftir talsmanni Hvíta hússins að bandaríkin hafi alltaf litið á það sem svo að vöruverð eigi að mótast af samkeppni á frjálsum markaði, en ekki með markaðsfjandsamlegu samráði á borð við þetta.