Fyrrum starfsmenn Kaupþings í Noregi stefna hátt

Fyrrum starfsmenn Kaupþings í Noregi hafa metnað til þess að verða einn af fimm stærstu verðbréfamiðlurum í kauphöllinni í Osló. Þetta kemur fram á Finansavisen.

Rætt er við Kim Evjenth einn forstöðumanna Argo Securities um málið en sú verðbréfamiðlun reis upp úr rústum Kaupþings í Noregi eftir að Saprebank1 keypti starfsemi Kaupþings í Noregi.

"Nú er að komast fullur skriður á starfsemina hjá okkur," segir Kim. "Við stefnum að því að verða í hópi hinna fimm stærstu."

Sem stendur er Argo með 40 starfsmenn sem flestir unnu áður hjá Kaupþingi. Kim reiknar með að starfsmannafjöldinn verði orðinn um 60 manns eftir tvö ár.

Aðspurður um afhverju þeir hafi breytt nafninu úr Kaupþing yfir í Argo segir Kim að fyrrnefnda nafnið hefði borið of mörg lík í lestinni eftir að bankakerfið á Íslandi hrundi.