Athyglin á gjaldþroti Woolworths eykur söluna um 20%

Athyglin sem gjaldþrot Woolworths hefur vakið í Bretlandi hefur leitt til þess að viðskiptavinir flykkjast í búðir verslunarkeðjunnar. Frá því að Deloitte tók við stöðu skiptastjóra í Woolworths hefur salan aukist um 20%.

Þetta kemur fram í umfjöllun Financial Times um málið. Þar segir að margir hafi nú áhuga á því að kaupa eigur úr þrotabúinu, þeirra á meðal athafnamaðurinn Theo Paphitis sem hvað þekktast er í Bretlandi fyrir hlutverk sitt sem dómari í sjónvarpsþáttaröðinni Dragon´s Den.

Neville Kahn sem stjórnar vinnu Deloitte við að finna kaupendur að eigum þrotabúsins segir að hann reikni með að gengið verði frá málinu í þessari viku. Baugur á rúmlega 10% hlut í Wolworths.

Meðal áhugasamra kaupenda nú er fjárfestingafélagið Endless frá Leeds, og fjárfestingarsjóðir á borð við Cerberus, Sun European Capital og Alchemy.