Bayern LB segir um sex þúsund manns

Þýski bankinn Bayern LB, sem hefur farið illa út úr fjármálakreppunni og meðal annars tapað á viðskiptum við íslenska banka, tilkynnti í dag um fyrirhugaðar uppsagnir á tæplega 6000 starfsmönnum. Tæplega tuttugu þúsund manns vinna hjá bankanum um allan heim og því verður um fjórða hverjum starfsmanni sagt upp.

Bayern LB var fyrsti bankinn til að óska eftir aðstoð frá Þýska ríkinu og hafa stjórnendur nú lýst því yfir að dregið verði úr umsvifum hans og að í framtíðinni verði aðaláhersla lögð á að lána litlum og millistórum fyrirtækjum í Þýskalandi.

Bayern LB óskaði eftir allt að 5,4 milljörðum evra í aðstoð og samkvæmt þýskum miðlum voru 1,5 milljarðar af þeirri upphæð raktir til þess hve bankinn hafi verið duglegur við að lána íslenskum bönkum.

Bayern LB var bankinn sem á dögunum veitti Seðlabanka Íslands lán upp á 300 milljón evrur og á sama tíma lokaði hann á lánalínu sem áður hafði verið lofuð Glitni. Bankinn hefur einnig lánað fleiri íslenskum bönkum.