Mikil óvissa um þróun langtímavaxta

Mikil óvissa er um þróun langtímavaxta á næstu vikum og mánuðum. Ljóst er að mikið framboð verður af verðtryggðum skuldabréfum með ríkisábyrgð á næstunni vegna endurfjármögnunar íbúðalána bankanna.

Greining Glitnis fjallar um málið í Morgunkorni sínu. Þar segir að á móti sé sókn sparifjáreigenda í skjól ríkistryggingar og verðtryggðra eigna um þessar mundir veruleg þar sem verðbólgan framundan er talsverð og óvissa mikil í öðrum fjárfestingarkostum.

Staðan á gjaldeyrismarkaði eykur síðan enn óvissuna þar sem það fyrirkomulag sem nú er við lýði hamlar verulega gjaldeyrisviðskiptum og aðkomu erlendra aðila að innlendum skuldabréfamarkaði.

Vegna óvissu á gjaldeyrismarkaði er allskostar óvíst með hvaða hætti núverandi eign erlendra aðila á innlendum skuldabréfamarkaði þróast. Þá ríkir einnig mikil óvissa um hvernig verðbólguþróun verður á næstunni.

Ef litið er nánar á framboðshlið skuldabréfamarkaðarins á næstunni má áætla að útgáfa Íbúðalánasjóðs á verðtryggðum skuldabréfum vegna endurfjármögnunar á íbúðalánum bankanna muni nema um 400 milljörðum kr. Þessu til viðbótar má ætla að halli verði á ríkissjóði á næsta ári upp á um 100 milljarða kr.

Greining telur rétt að undirstrika að varðandi hallareksturinn er verið að ræða um allt næsta ár. Á móti kemur að handbært fé ríkissjóðs er nú verulegt og mun ríkissjóður ganga á gildar innistæður sínar í Seðlabanka áður en farið verður að fjármagna hallarekstur með ríkisbréfaútgáfu.