Jefferies Group í mál við Landsbankann hf.

Fjármálafyrirtækið Jefferies Group hefur höfðað mál gegn Landsbankanum hf. fyrir dómstóli í London vegna vangoldinnar skuldar upp á 4,3 milljónir evra eða nær 800 milljóna kr..

Þar með eru 13 dómsmál í gangi gegn Landsbankanum, Glitni og Kaupþingi. Hið stærsta þeirra er gegn Glitni en í því hafa 16 bankar og fjárfestingarsjóðir sameinast um málsókn vegna skulda upp á 150 milljónir punda eða 30 milljarða kr.. Bloomberg-fréttaveitan greinir frá þessu.

Jefferies Group er með höfuðstöðvar í New York en það er dótturfélag þess í Bretlandi, Jefferies International, sem höfðar málið vegna láns sem það veitti Landsbankanum í júní 2007. Samkvæmt málsgögnum hefur Landsbankinn aldrei borgað krónu af því til baka.