Illinois ríki í stríð við Bank of America

Fjölskyldufyrirtækið Republic Windows & Doors í Chicago tilkynnti með þriggja daga fyrirvara að fyrirtækinu yrði lokað vegna þess að Bank of America hefði lokað lánalínum.

Samkvæmt vinnulöggjöfinni eiga menn rétt á 60 daga launum plús greiðslu fyrir áunnið sumarfrí við lokun fyrirtækja.

220 starfsmenn glerverksmiðjunnar eru gramir Bank of America fyrir að kippa fótunum undan verksmiðjunni. Þeir benda á að bankinn hafi fengið fimmtán milljarða dollara af því fé sem alríkisstjórnin veitti í bankaaðstoð sína.

Þeir krefjast þess að bankinn greiði þeim uppsagnarfrestinn. Undir það tekur Rod Blagojevich ríkisstjóri sem segir að ella muni ríkið í heild hætta öllum viðskiptum við Bank of America.

Við það myndi bankinn missa hundruð milljóna dollara sem hann fær árlega í þóknun og umboðslaun.