Spáir 17,8% verðbólgu í desember

Að mati greiningar Glitnis mun vísitala neysluverðs (VNV) hækka um 1,2% í desember. Gangi spáin eftir mun ársverðbólga aukast úr 17,2% í 17,8%.

Fjallað er um málið í Morgunkorni greiningarinnar. Að þessu sinni gerir greiningin ráð fyrir að þeir vöruflokkar sem að mestu leyti eru innfluttir vegi þyngst til hækkunar, en það eru t.d. föt og skór, húsgögn og heimilisbúnaður og innflutt matvæli.

Þó mun verðhækkun á matvælum verða minni en ella þar sem þær vörur sem mestan veltuhraða hafa í dagvöruverslunum hafa þegar tekið að lækka eftir styrkingu krónu í kjölfar enduropnunar millibankamarkaðar. Veruleg lækkun eldsneytis undanfarinn mánuð vegur á móti til lækkunar vísitölunnar, auk þess sem lítil hækkun húsnæðisliðar og þjónustu ýmis konar mun að öllum líkindum draga úr heildarhækkun VNV að þessu sinni.

„Verðbólga er nú við það að ná hámarki að mati okkar. Teljum við að ársverðbólgan muni fara hæst í 18% á fyrstu mánuðum næsta árs," segir í Morgunkorninu.