Stefnir í harða deilu um eignir Landsbankans í Bretlandi

Ríkisstjórn Bretlands hefur beðið endurskoðunarfyrirtækið Ernst & Young að vera í viðbragðsstöðu og tilbúið án fyrirvara að taka við sem skiptastjórar yfir eignum Landsbankans í Bretlandi.

Samkvæmt frétt í breska blaðinu The Times stefni þar með í harða deilu milli ríkisstjórna Íslands og Bretlands um eignir bankans í Bretlandi.

Skiptastjórn Ernst & Young myndi hafa afdrifaríkar afleiðingar fyrir verslunarkeðjur í Bretlandi, þar á meðal Baug Group, þar sem stór hluti þeirra var fjármagnaður af Landsbankanum og keppinaut hans, Singer & Friedlander sem var í eigu Kaupþings.

Times hefur heimildir fyrir því að 100 milljón punda lán sem Seðlabanki Englands veitti Landsbankanum nýlega hafi verið notað til að bankinn gæti veitt lausafé til viðskiptavina sinna í verslunarrekstri í Bretlandi.

"Skiptastjórn yfir Landsbankanum gæti haft alvarlegar diplómatískar afleiðingar á samband Íslands og Bretlands sem ekki er beysið fyrir," segir í The Times. "En til stendur að íslenska ríkið fari í mál við það breska vegna yfirtökunnar á Kaupþingi."