Nóbelsjóðurinn hefur tapað 10 milljörðum króna

Nóbelsjóðurinn, sem stendur á bakvið Nóbelsverðlaunin, hefur tapað 650 milljónum norskra kr, eða um 10 milljörðum kr. á þessu ári. Þetta kemur fram í Finansavisen sem reiknaði út tapið miðað við hluta- og verðbréfaeign sjóðsins í upphafi ársins.

Samkvæmt umfjöllun Finansavisen hafði sjóðurinn fjárfest fyrir um 3,1 milljarða norskra kr., eða hátt í 50 milljarða kr., í ýmsum bréfum um áramótin. Þar af voru 64% í hlutabréfum.

Þar í viðbót koma ýmsar fjárfestingar sem sjóðurinn hefur tapað stórt á, til dæmis í vogunar- og fasteignasjóðum. Sjóðurinn átti meðal annars hlut í Carnegie Worldwide sem hefur lækkað um rúm 20% í ár.

Þar með lítur út fyrir að árið 2008 verði eins slæmt fyrir sjóðinn og árið 2002 sem var hið versta í sögu hans hingað til. 2002 gufuðu upp um 21,4% af fyrrum eigum Alfred Nobel.