Klámdrottning verður forstjóri í eigin fyrirtæki

Danska klámmyndastjarnan fyrrverandi, Katja Kean, er orðin forstjóri í eigin fyrirtæki og gengur rekstur þess með afbrigðum vel. Í dag ber Katja nafnið Sussi La Cour sem er raunar upprunalegt nafn hennar.

Sussi hætti í klámmyndabransanum árið 2004 og skömmu síðar hóf hún að hanna og selja eigin línu af kvennundirfötum undir nafninu Katja K. Í fyrstu seldi hún undirföt sín í aðrar verslanir en á nú sjálf eigin búðir í Kaupmannahöfn.

Í umfjöllun Jyllands-Posten um fyrirtækið Katja K segir Sussi að frá upphafi hafi hún lagt áherslu á vöruna sem hún hannar og framleiðir og aldrei reynt að nota fortíð sína sem vinsæl klámmyndastjarna sér til framdráttar í þeim efnum.

Hún veitir ekki viðtöl lengur um fortíð sína en talar við hvern sem er um viðskiptalíf sitt. Samhliða því hefur hún breytt útliti sínu, farið úr því að verða ljóska og litað hár sitt dekkra. Og nú gengur hún um með gleraugu í stað þess að nota linsur.

Þetta gerir hún, að sögn Jyllands-Posten til að leggja áherslu á hina nýju persónu sína og til að undirstrika að hún er núna forstjórinn Sussi La Cour en ekki Katja Kean.