Greiðslukortum lokað hjá þúsund Íslendingum á Fjóni

Um eitt þúsund íslenskir námsmenn og ellilífeyrisþegar búsettir á Fjóni í Danmörku geta ekki lengur notað greiðslukort sín. Þeim hefur verið lokað.

Þetta kemur fram í frétt í blaðinu Fyens Stiftstidende. Þar er m.a. greint frá Önnu Runólfsdóttir og Jón Helga Sveinsson sem lentu í því um helgina að geta ekki verslað í matinn.

Bylgja Winther-Jörgensen varaformaður Íslendingafélagsins á Fjóni segir að Anna og Jón séu langt frá því þau einu sem lent hafa í vandræðum með kortin sín.

Tekið skal fram að um er að ræða greiðslukort sem gefin eru út í Danmörku en ekki á Íslandi. Samkvæmt upplýsingum frá Valitor/Visa vita þeir ekki til að vandræði séu með íslensku kortin.

Sjálf segir Bylgja að hún sé gift Dana og hafi dankort en faðir hennar sé ellilífeyrisþegi sem fái 80% lífeyri frá Íslandi og 20% frá danska ríkinu. Nú fái hann aðeins greitt 20% af lífeyri sínum.

Fram kemur að fjöldi Íslendinga hafi fengið skilaboð þegar fyrir helgina um að kort þeirra væru lokuð.