Gestum í Tívolíið fækkaði um yfir 100.000 í sumar

Gestum í Tívolíið í Kaupmannahöfn í sumar fækkað um yfir 100.000 miðað við sama tímabil í fyrra. Forráðamenn þessa sögufræga skemmtigarðs sjá þó ljósa púnkta í aðsókninni.

Alls komu rúmlega 2,8 milljón gesta í heimsókn í Tívolíið á tímabilinu 17. apríl til 22. september. Í fyrra voru gestirnir rúmlega 2,94 milljónir talsins.

Lars Liebest framkvæmdastjóri Tívolísins segir að ef miðað sé við að skemmtigarðurinn var opinn nokkrum dögum skemur en í fyrra, efnahagslægðina sem ríkt hefur og miklar rigningar í ágúst sé hægt að vera ánægður þrátt fyrir minni aðsókn.

"Á sama tíma getum við glaðst yfir því að ánægja gesta með skemmtigarðinn hefur aukist," segir Lars.