Ecclestone: Raikkönen skrítinn gaur og Hamilton líkur Schumacher

Bretinn Bernie Ecclestone er óhræddur að láta vinda blása þegar hann er í viðtölum við fréttamenn, en keppt er í Formúlu 1 í Japan um helgina.

Fyrir skömmu kallaði hann þjónustumenn Ferrari trúða, eftir að forseti Ferrari sagði mótið í Singapúr eins og sirkus. Í dag ræddi hann um Kimi Raikkönen við ítalskan fjölmiðil um núverandi meistara, Kimi Raikkönen.

"Kimi er skrítinn gaur og ég kann ágætlega við hann, eins og hann er. En þegar menn eru meistarar, þá þurfa þeir að opna sig og gefa gott fordæmi. Það hefur Raikkönen ekki gert", segir Eccestone sem finnst Finninn þumbaralegur á köflum. Á móti segir Raikkönen að hann sjái enga ástæðu til að verða annar karakter en hann er, þó hann hafi orðið meistari.

"Það er mér hulinn ráðgáta hvert hæfileikar Raikkönen hafa horfið þetta árið hvað aksturinn varðar. Felipe Massa hefur aftur á móti verið óheppinn, en það væri slæmt ef Lewis Hamilton vinnur ekki titilinn í ár, eftir brösótt gengi liðsins í fyrra og slæmar ákvarðanir liðsins. En það væri jafn leiðinlegt ef Massa ynni ekki. Hamilton er hinsvegar í flokki með Ayrton Senna og Michael Schumacher", sagði Eccelstone.

Bein útsending frá lokaæfingu og tímatökunni á Fuji brautinni í Japan verður á Stöð 2 Sport í kvöld.