Aðgerðir Bandaríkjastjórnar mælast vel fyrir á markaði

Bandaríkjastjórn kynnti í dag aðgerðir á fjármálamörkuðum þar sem gert er ráð fyrir að ríkið kaupi hlut í níu stórum bönkum vestra. Aðgerðirnar höfðu jákvæð áhrif á markaði í Bandaríkjunum í dag.

Alls verður 250 milljörðum dollara varið til aðgerðanna en um er að ræða sams konar aðgerðir og stjórnvöld víða í Evrópu hafa gripið til. George Bush Bandaríkjaforseti sagði í sjónvarpsávarpi í dag að aðgerðirnar væru nauðsynlegar til þess að tryggja að bandarískir bankar gætu staðið við skuldbindingar sínar. Ekki væri ætlunin hjá stjórnvöldum að sölsa undir sig hinn frjálsa markað heldur varðveita hann. Þau skilyrði fylgja aðstoðinni til bankanna að stjórnendur þeirra verða að fallast á hámarkslaun.

Svo virðist sem tíðindin hafi haft góð áhrif á markaði vestan hafs því Dow Jones og Standar & Poor´s vísitölurnar hækkuðu um fjögur prósent við opnun markaða en lækkuðu svo aðeins aftur. Þær hækkanir bætast við methækkanir í gær upp á yfir tug prósenta.