Sparisjóðir kaupa Glitni Bank í Noregi

Samband sparisjóða í Noregi hefur fest kaup á Glitni Bank í Noregi og er kaupverðið 300 milljónir norskra króna eða sem svarar til 5,1 milljarðs kr.

Um er að ræða SpareBank 1 SMN sem kaupir 25% en kaupin skiptast að öðru leyti þannig að SpareBank 1 SR-Bank leggur til 20% af kaupverðinu, SpariBank Nord-Norge 20%, Sparebanken Hedmark 15% og afgangurinn kemur frá 16 minni sparisjóðum sem sameinast hafa um sinn hlut.

Finn Haugan forstjóri SpareBank 1 segir að sparisjóðirnir hafi bæði styrk og samstöðu til að kaupa Glitni án þess að þurfa að leita fjár til þess út fyrir sínar raðir.

Eftir sem áður munu höfuðstöðvar Glitnir Bank verða í Þrándheimi.