NBA: Denver á sigurbraut

Chauncey Billups er að skila sínu hjá Denver Nuggets. Síðan hann kom til liðsins hefur liðið unnið sjö af átta leikjum sínum, nú síðast gegn San Antonio Spurs í nótt.

Alls fóru tíu leikir fram í deildinni í nótt. Denver vann San Antonio með tíu stiga mun, 91-81, þar sem Billups var stigahæstur með 22 stig. Carmelo Anthony kom næstur með 21 stig. Þetta var fjórði sigur Denver í röð.

San Antonio hafði unnið þrjá leiki í röð fyrir þennan en leikmönnum Denver tókst að halda Tim Duncan í aðeins tólf stigum. Þeir Tony Parker og Manu Ginobili eru enn frá vegna meiðsla.

Nýliðinn George Hill var stigahæstur hjá San Antonio með 20 stig.

Atlanta vann Washington, 91-87, þar sem Marvin Williams tryggði Atlanta sigurinn með þriggja stiga körfu þegar 26 sekúndur voru til leiksloka. Williams skoraði 21 stig í leiknum og tók fjórtán fráköst er Atlanta vann sinn fyrsta sigur í síðustu fimm leikjum. Mike Bibby var þó stigahæstur hjá liðinu með 25 stig. Caron Butler átti góðan leik í liði Washington og skoraði 32 stig.

Toronto vann Miami, 101-95. Andrea Bargnani skoraði 25 stig fyrir Toronto og Jermaine O'Neal bætti við sextán stigum auk þess sem hann tók sautján fráköst. Dwyane Wade skoraði 40 stig fyrir Miami og gaf ellefu stoðsendingar en það dugði ekki til.

LA Clippers vann Oklahoma City, 108-88. Cuttino Mobley skoraði tólf af sínum 32 stigum í þriðja leikhluta er Clippers komst í 23-4 sprett sem var nóg til að tryggja liðinu sigur. Mobley stal þar að auki sjö boltum. Chris Kaman var með 25 stig og fjórtán fráköst fyrir Clippers.

Minnesota vann Philadelphia, 102-96, og batt þar með enda á átta leikja taphrinu. Al Jefferson skoraði 25 stig fyrir Minnesota.

Sacramento vann New Orleans, 105-96. John Salmons skoraði 29 stig fyrir Sacramento en Chris Paul 20 stig fyrir New Orleans en hann gaf þar að auki fimmtán stoðsendingar.

Dallas vann Houston, 96-86. Houston var án Yao Ming í leiknum en Josh Howard var fjarverandi úr liði Dallas. Jason Terry skoraði 31 stig fyrir Dallas og Dirk Nowitzky 24.

Utah vann Milwaukee, 105-94. CJ Miles skoraði 25 stig fyrir Utah, rétt eins og Richard Jefferson gerði í liði Milwaukee. Andrew Bogut kom næstur með 20 stig hjá síðarnefnda liðinu.

Detroit vann Cleveland, 96-89. Allen Iverson skoraði 23 stig fyrir Detroit og Rasheed Wallace 21 auk þess sem hann tók fimmtán fráköst. Hjá Cleveland voru LeBron James og Maurice Williams stigahæstir með 25 stig hvor.

Portland vann Chicago, 116-74. Brandon Roy skoraði 20 stig fyrir Portland og Joel Przybilla fjórtán. Andres Nocioni skoraði flest stig fyrir Chicago eða alls þrettán talsins.