200 verslunum Woolworths lokað

200 af rúmlega 600 verslunum bresku verslanakeðjunnar Woolworths verður lokað í dag. Forsvarsmenn fyrirtækisins óskuðu eftir greiðslustöðvun í nóvember en keðjan skuldar hátt í 385 milljónir punda.

Enginn kaupandi fékkst og því var ákveðið að loka fyrirtækinu í áföngum. 200 verslunum verður lokað í dag, öðrum 200 2. janúar á nýju ár og restinni þremur dögum síðar. Búist er við að 27.000 manns missi vinnuna þegar verslunarkeðjan leggur upp laupanna 99 árum frá því að fyrsta verslunin var opnuð.

Baugur og Malcolm Walker, forstjóri Iceland verslunarkeðjunnar, gerðu kauptilboð í Woolworths í ágúst sl. en því tilboði var hafnað.