Gjaldþrot Stones hefur lítil áhrif á Landic

„Okkar krafa var á meðal þeirra þriggja sem voru lagðar fram í réttinum í dag og urðu til þess að þeir voru úrskurðaðir gjaldþrota," segir Páll Benediktsson, hjá Landic Property en Stones invest var úrskurðað gjaldþrota í dag. Landic Property og Stones invest elduðu grátt silfur saman í kjölfar þess að kaup Stones á Keops development gengu ekki eftir.

„Við vorum með tiltölulega litla kröfu út af virðisaukaskatti sem við vitum að þeir hafa ekki innt af hendi. Svo teljum við okkur eiga meira inni í þessu félagi, rúmar 140 milljónir danskar, þannig að við kætumst svo sem ekkert yfir þessu. En nú er auðvitað komið í ljós hverjir það voru sem hafa svikist undan merkjum í þessum samningum af því þeir gátu ekki staðið við skuldbindingar sínar," segir Páll.

Páll segir að hjá Landic hafi menn fundið það í öllu ferlinu, frá því Stones riftu samningnum á kaupunum á Keops development að þeir réðu ekkert við sín mál. „Við höfum vitað lengi að það stefndi í þrot hjá þeim," segir Páll.

Hann bætir við að hjá Landic hafi menn velt því fyrir sér hvernig ætti að bregðast við vanefndum Stones á sínum tíma. „Við ákváðum að lokum að taka Keops aftur til okkar. Það sýnir sig núna að var mjög hyggileg ákvörðun því þar eru mikil verðmæti inni sem hefðu annars farið núna inn í þennan gjaldþrotaskiptapakka."

Páll segir að gjaldþrot Stones komi ekki til með að hafa mikil áhrif á Landic Property. „Þetta er ekkert alvarlegt áfall fyrir okkur, og við gerum ráð fyrir að fá okkar fé til baka úr þessum þrotaskiptum enda eru þarna, hvað sem hver segir, miklar eignir inni. Þetta er fyrst og fremst leiðindamál sem veldur því að við verðum með eitthvað fé bundið þarna inni í einhvern tíma sem við hefðum getað náð út í samningum við þá strax, en fór sem fór," segir Páll Benediktsson.