XL Leisure gjaldþrota

Breski ferðaheildsalinn XL Leisure er gjaldþrota eftir því sem heimildir Vísis herma.  Félagið er að einhverju leyti í eigu Íslendinga.Þeirra á meðal er Magnúsar Stephensen. Ekki náðist í Magnús við vinnslu þessarar fréttar.

Gjaldþrot XL Leisure, sem er þriðja stærsta ferðaskrifstofa Bretlands á eftir Tui Travel og Thomas Cook, hefur víðtæk áhrif. Allar vélar félagsins, sem eru 21, hafa verið stöðvaðar en óljóst er hversu margir farþegar verða fyrir óþægindum eða hreinlega tapa ferðum sem þeir hafa keypt. Samkvæmt vef breska blaðsins The Times er um að ræða þúsundir Breta.

Stjórnarformaður XL Leisure er Magnús Þorsteinsson, fyrrverandi stjórnarformaður Eimskips og skráður eigandi stærsta einstaka hlutarins í Eimskip.

XL Leisure hefur verið mikið í fréttum að undanförnu enda hefur Eimskip verið í ábyrgð fyrir 27 milljarða láni sem Landsbankinn veitti núverandi eigendum félagsins þegar það var keypt af Eimskip síðla árs 2006. Í fyrradag var tilkynnt að feðgarnir Björgólfur Guðmundsson og Björgólfur Thor Björgólfsson, sem fara með tæp 40% hlut í Eimskip í gegnum eignarhaldsfélög sín og Landsbankann, hefðu tekið yfir ábyrgð Eimskips í formi víkjandi láns. Líklegt þykir að því láni verði breytt í hlutafé í Eimskip og þeir feðgar eignist félagið með húð og hári.

XL Leisure er einnig einn helsti styrktaraðili enska úrvalsdeildarliðsins West Ham og auglýsir framan á búningum þess. Eigandi West Ham er Björgólfur Guðmundsson. XL Leisure Group skuldbatt sig í sumar til að greiða 2,5 milljónir punda, um 425 milljónir króna en útlit er fyrir að þeir peningar skili sér ekki.

Straumur á nokkurra hagsmuna að gæta gagnvart XL Leisure og herma heimildir Vísis að bankinn þurfi að afskrifa nokkra milljarða vegna gjaldþrotsins.