Trichet segir Ísland verða að ganga í ESB til að taka upp evruna

Jean-Claude Trichet seðlabankastjóri Evrópubankans segir að Ísland verði að ganga í Evrópusambandið ef þjóðin ætlar að taka upp evruna. Þetta kom fram í máli Trichet á fundi með efnahagsnefnd ESB í gærdag.

Í frétt um málið á Dagens Industri kemur fram að Trichet telji að regluverkið í kringum evruna geri það að verkum að einhliða upptaka evru hjá Íslendingum gangi ekki upp. „Landið verður að gerast meðlimur að ESB og síðan munum við fella Maastricht-ákvæðin að aðild landsins," segir Trichet.

Fyrrgreindur fundur fjallað annars að mestu um stöðuna í alþjóðafjármálunum. Trichet segir að millibankavextir bæði vestanhafs og austan séu nú alltof háir. Seðlabankar í viðkomandi löndum vinni hinsvegar að því að auka lausafé bankanna og þar með lækka þessa vexti.