Green vill hverfa aftur til gamalla tíma

Breski auðjöfurinn Philip Green segir að fólk hafi verið hvatt til skuldsetningar og að auðvelt hafi verið að taka lán að undanförnu. Því sé fólk víða um heim í vandræðum.

Í viðtali við breska blaðið Daily Mirror kemur fram að hann telji farsælustu lausnina á fjármálakreppunni að hverfa aftur til gamals tíma þegar bankar voru í meiri samskiptum við viðskiptavini sína og Bretar höfðu meiri stjórn á skuldsetningu sinni.

„Fólk hefurt verið hvatt til skuldsetningar. Allir vilja stærra hús, betri bíl og að ferðast til ókunnra staða. Ef þetta er gert auðvelt lætur fólk það eftir sér," segir Green um lánastefnu fjármálastofnana.

Þá segir hann að hinn venjulegi maður, og jafnvel hann sjálfur, skilji vart hvað sé að gerast í heiminum um þessar mundir. „Við verðum að muna að í tíu ár í landinu var stöðugur hagvöxtur og lítil verðbólga og þá höfðu allir það betra," segir Green og vísar til tíma fyrir útlánaþensluna.

Green segir að einhverjir kaupmenn og verslunareigendur muni heltast úr lestinni og hluti almennings lenda í vandræðum í núverandi kreppu en telur engu að síður að máluð hafi verið of dökk mynd af ástandinu. „Menn verða að beita almennri skynsemi. Ef fólk getur ekki borgað af húsnæði sínu þarf það að leita til bankastjórans og leita lausna, eins og í gamla daga," segir Green.

Daily Mirror kemur einnig inn á tilraunir Greens til þess að kaupa skuldir Baugs í Bretlandi. Segir blaðið að ef af því verði þá eignist hann verslanakeðjur eins og Oasis, Iceland, Hamleys og Jane Norman. Með því yrði hann áhrifamesti maðurinn á fataverslunargeiranum í Bretlandi með yfir 90 þúsund manns í vinnu í 6.500 búðum.