Stjórnendur Lehman Brothers kallaðir til yfirheyrslu vegna gjaldþrots

Vel á annan tug stjórnenda bandaríska fjárfestingabankans Lehman Brothers hafa verið kallaðir til yfirheyrslu fyrir rannsóknarkviðdómi vegna gjaldþrots bankans í síðasta mánuði.

Bandaríska blaðið Washington Post greinir frá þessu. Þar á meðal eru Richard Fuld, fyrrverandi framkvæmdastjóri, og Erin Callan, sem var fjármálastjóri bankans.

Þrjár rannsóknir eru í gangi vegna málsins og hugsanlegt að einhverjir verði ákærðir vegna gjaldþrotsins en grunur leikur á að fjárfestum hafi verið gefnar rangar upplýsingar um stöðu bankans skömmu áður en hann fór í þrot.