Massa á ráspól í Mónakó

Ferrari gerði góða hluti í tímatökunum fyrir Mónakókappaksturinn í Formúlu 1 á morgun. Felipe Massa náði besta tímanum og verður á ráspól og félagi hans Kimi Raikkönen náði öðrum besta tímanum.

McLaren bílarnir eru vanir að gera góða hluti í Monte Carlo, en þeir urðu að játa sig sigraða gegn sprækum Ferrari bílunum í dag.

Þetta var annar ráspóllinn í röð sem Brasilíumaðurinn Massa nær í röð og hans þriðji á árinu. Hann sló tíma félaga síns Raikkönen við á lokasprettinum í dag.

Þetta var fyrsti ráspóll Ferrari liðsins í Mónakó í átta ár.

"Ég trúi ekki enn að ég sé á ráspól. Það er ótrúlegt. Ég er búinn að æfa mig mikið að keyra í Mónakó og vildi gera mitt allra besta núna, því mér hefur aldrei gengið sérstaklega vel á þessari braut," sagði Massa ánægður.

10 bestu tímarnir í dag:

1 Felipe Massa (Bra) Ferrari 1min 15.787secs

2 Kimi Raikkonen (Fin) Ferrari 1:15.815

3 Lewis Hamilton (Eng) McLaren 1:15.839

4 Heikki Kovalainen (Fin) McLaren 1:16.165

5 Robert Kubica (Pól) BMW Sauber 1:16.171

6 Nico Rosberg (Þýs) Williams 1:16.548

7 Fernando Alonso (Spá) Renault 1:16.852

8 Jarno Trulli (Íta) Toyota 1:17.203

9 Mark Webber (Aus) Red Bull 1:17.343

10 David Coulthard (Eng) Red Bull 1:15.839