Gústaf veldur olíuverðshækkun

Fellibylnum Gústaf er um að kenna að heimsmarkaðsverð á hráolíu hefur hækkað um rúma 2,6 dali á tunnu í dag og fór í rúma 117 dali á tunnu. Fellibylurinn olli talsverðum usla á Haítí í gær en reiknað er með að hann komi sterkur inn á Mexíkóflóa síðar í vikunni og nemi land í Bandaríkjunum á mánudag.

Fimmtungur af olíuframleiðslu Bandaríkjanna er við flóann og setur minnsta skerðing á olíuframleiðslu skarð í heildarframleiðsluna. Olíufélagið Shell, sem er með starfsemi við flóann, hefur gefið það út að svo kunni að fara að starfsmenn verði fluttir á brott síðar í dag gangi spár veðurfræðinga eftir.

Gengisveiking bandaríkjadals gagnvart evru vegur sömuleiðis þungt en við veikinguna kaupa fjárfestar oft olíu til sér varnar.

Bandaríska orkumálaráðuneytið birtir vikulega skýrslu sína um olíubirgðastöðu landsins síðar í dag. Sérfræðingar telja flestir að vegna minnkandi eftirspurnar eftir olíu og eldsneyti muni hráolíubirgðir aukast um 1,5 milljónir tunna á milli vikna.

Heimsmarkaðsverðið fór í rúma 147 dali á tunnu í júlí. Þrátt fyrir mikla lækkun síðan þá er það engu að síður rúmlega 60 prósentum hærra en á sama tíma og í fyrra.