Bati á millibankamarkaði erlendis kemur Íslendingum til góða

Nokkur bati hefur orðið á millibankamörkuðum erlendis síðustu daga og er það til marks um að umfangsmiklar aðgerðir yfirvalda í helstu iðnríkjum til að afstýra alþjóðlegri bankakreppu séu farnar að skila árangri. Þetta kemur lántakendum á Íslandi til góða.

Greining Glitnis fjallar um málið í Morgunkorni sínu. Þar segir að áhættufælni er þó enn gríðarlega mikil á fjármálamörkuðum og mun taka allangan tíma að koma þeim í eðlilegt horf að nýju.

Batinn er snarpastur í daglánavöxtum, þar sem til að mynda LIBOR vextir til einnar nætur eru nú ekki langt frá stýrivöxtum eftir að hafa í sumum tilfellum verið mun hærri á síðustu vikum.

„LIBOR vextir til 3ja mánaða mynda grundvöll vaxtakjara á stórum hluta gengistryggðra lána íslenskra fyrirtækja og heimila, og því getur skipt miklu máli fyrir greiðslubyrði þessara lána hvort áhættufælni minnkar og LIBOR vextir færast nær væntum stýrivöxtum í helstu myntum," segir í Morgunkorninu.