Bretar vilja rannsókn á Moody og Fitch vegna íslensku bankanna

Samtök sveitarfélaga í Bretlandi vilja opinbera rannsókn á matsfyrirtækjunum Moody og Fitch vegna lánshæfiseinkunna þeirra á íslensku bönkunum skömmu áður en þeir komust í þrot.

Nú er komið í ljós að alls áttu 116 bæjar- og sveitarfélög á Bretlandaseyjum innistæður í íslensku bönkunum og var þar að stærstum hluta um Landsbankann að ræða og Icesave reikinga hans. Heildarupphæðin er tæplega 900 milljónir punda eða hátt í 200 milljarðar kr.

Samtök sveitarfélaga vilja að breska ríkisstjórnin hefji nú opinbera rannsókn á Moodys og Fitch. Margaret Eaton formaður samtakanna segir að þótt sveitarfélög eigi ekki að reiða sig eingöngu á lánshæfiseinkunnir frá matsfyrirtækjum verði að vera hægt að treysta mati þeirra.

Hún telur að matsfyrirtækin hafi algerlega brugðist hvað íslensku bankana varðar en þeir höfðu allir háar og viðunandi einkunnir allt þar til nokkrum dögum áður en þeir fóru í þrot.

Fleiri en sveitarfélögin hafa brennt sig illa á íslensku bönknum í Bretlandi. Nú er komið í ljós að ríkisendurskoðun landsins hafði lagt milljónir punda inn á reikninga í bönkunum sem og meir en tugur háskóla landsins þar á meðal hinn fornfrægi Oxford-háskóli.