Harvard háskólinn tapar miklum fjárhæðum í kreppunni

Hinn þekkti Harvard háskóli í Bandaríkjunum fer ekki varhluta af fjármálakreppunni. Fjárfestingarsjóður skólans hefur tapað nær 900 milljörðum kr. á síðustu fjórum mánuðum.

Sökum þessa neyðist skólinn nú til að gefa út skuldabréf fyrir 70 milljarða kr. ásamt því að skera verulega niður í rekstrinum á næsta ári að því er segir á business.dk.

Fram kemur í fréttinni að síðustu fjórir mánuðir séu þeir verstu í sögu skólans undanfarin 40 ár hvað fjármálin varðar. Fjárfestingarsjóðurinn hefur á þeim tíma tapað 20% af eignum sínum og rektorinn, Drew Faust, segir að uppgjör ársins í heild verði enn verra.

Orsök þess að tapið hjá sjóðnum er svo mikið er að hann hefur haft stóran hlut af lausafé sínu í vogunarsjóðum og á fasteignamarkaðinum. En bæði hlutabréf og fasteignir hafa hríðfallið í verði undanfarna mánuði.

Um þriðjungur af rekstarfé Harvard kemur frá þessum sjóði og því boðar Drew Faust niðurskurð á næsta ári.