Hlutabréf í Evrópu áfram á uppleið

Hlutabréf í Evrópu héldu áfram að hækka í verði í morgun þegar opnað var fyrir viðskipti.

Þannig hækkaði FTSEurofirst 300 vísitalan um 5,4 prósent en það bætist við rúmlega tíu prósenta hækkun í gær. Þá hækkuðu hlutabréf í Lundúnum um fjögur prósent í morgun, franska CAC-vísitalan um 4,5 prósent og DAX-vísitakan í Þýskalandi um fjögur prósent.

Þá hækkuðu markaðir í Bandaríkjunum mikið í gær, en Dow Jones vísitalan hækkaði um ellefu prósent sem er met á einum degi. Enn fremur hækkaði Nasdaq-vísitalan um tólf prósent.

Hækkanirnar koma í kjölfar tíðinda af aðgerðum stjórnvalda víða um heim sem hafa dælt fjármunum inni í bankakerfið. Búist er við frekari tíðindum af þeim vettvangi í Bandaríkjunum í dag þegar tilkynnt verður um 250 milljarða dollar innspýtingu í banka þar í landi.