Búið að leysa fiskkarakreppuna á Vestfjörðum

Flutningur á fiskikörum til Vestfjarða er aftur kominn í samt horf eftir að forsvarsmenn Umbúðamiðlunar, Samskipa, Eimskipa og fiskmarkaða sátu fund í gærkvöldi og ákváðu að reyna að vinna að lausn á þeim vanda sem skapaðist.

Fjallað er um málið á vefsíðu Bæjarins Besta í dag. Vandamálið kom upp þegar Umbúðamiðlun neitaði að greiða gjald sem Samskip og Eimskip settu á vegna flutnings á tómum körum frá Vestfjörðum en sú þjónusta hafði áður verið innifalin í flutningskostnaði.

„Við ætlum að vinna að endurskipulagningu á kerfinu og okkur þykir ávallt erfitt þegar þriðji aðili verður fyrir tjóni eða vandræðum vegna einhverra aðgerða. Við munum skoða alla þá galla og kosti sem fylgja flutningakerfinu innanlands og utanlands. Það eru allir flutningsaðilar að flytja kör í dag," segir Ólafur Ólafsson, framkvæmdastjóri Umbúðamiðlunar í samtali við bb.is.

Hjá Fiskmarkaði Bolungarvíkur og Suðureyrar var útlitið ekki gott í gær vegna skorts á körum og leit út fyrir að loka þyrfti markaðnum í dag hefðu kör ekki borist vestur að söng Samúels Sigurjóns Samúelssonar, verkstjóra Fiskmarkaðsins.

„Við þurftum ekki að stoppa í morgun enda engin bátur kominn í land. Við eigum sextíu kör eins og er en ef kör hefðu ekki borist okkur í dag hefðum við þurft að loka. Ég var að heyra í flutningsaðilum fyrir sunnan og að þeirra sögn eru körin á leiðinni vestur," segir Samúel.