George Soros segir heimshagkerfið standa á barmi hyldýpisins

Auðkýfingurinn George Soros segir í viðtali við franska fréttatímaritið L'Express að hvorki Bandaríkin né Evrópa sleppi við alvarlega efnahagskreppu.

Í viðtalinu segir Soros að þó efnahagur Bandaríkjanna virðist hafa staðið af sér fjármálakreppuna og hrun húsnæðismarkaða sé óumflýjanlegt að kreppa skelli á í Bandaríkjunum nú á haust eða vetrarmánuðum. Soros segir að hið versta sé enn eftir, og að þó seðlabankar í Bandaríkjunum og Evrópu hafi gert sitt besta til að lina fjármálakrísuna sé óvissa enn gríðarleg og vantraust einkenni markaði. Við slíkar aðstæður geti fjármálakerfi heimsins ekki sinnt hlutverki sínu, sem leiði til þess að kyrkingur hlaupi í alla efnahagsstarfsemi.

Þá segir Soros að heimshagkerfi standi nú, í fyrsta sinn síðan 1930, á barmi hyldýpisins og algers hruns. Þar tekur hann í raun undir orð fjármálaráðherra Bretlands, Alistair Darling, sem sagði fyrir viku að efnahagsaðastæður þær sem Bretland stæði frammi fyrir væru þær verstu síðan í upphafi heimskreppunnar.

Soros kennir Alan Greenspan um hvernig komið er, og segir að ákvörðun Greenspan að lækka vexti niður úr öllu valdi í byrjun áratugarins hafi lagt grunninn að óeðlilegum verðhækkunum á húsnæði. Þá hafi aðilar á markaði haft oftrú á mætti hinnar ósýnilegu handar og markaðslögmálunum - svo hafi virst sem menn hafi haldið að meðan markaðirnir fengju að starfa óáreittir gæti ekkert farið úrskeiðis. Markaðir séu hins vegar ekki fullkomnir, upplýsingaflæði sé ójafnt og áhættur því oftar en ekki rangt metnar.

Spurður að því hvort hann sé að krefjast nýrra og hertari reglna um fjármagnsviðskipti svarar Soros því til að hann vilji alls ekki að stjórnvöld fari offari í reglusetningu. Stjórnmálamenn séu fólk, líkt og bankamenn og fjárfestar, og séu því jafn líklegir til að taka rangar ákvarðanir eða ganga of langt. "En fjármálakerfið hefur tekið að hegða sér svo óskynsamlega að það þarf að setja einhver bönd á það, án þess þó að það hefti efnahagsstarfsemi," bætti Soros við.