Keppt í hitasvækju í Malasíu um páskana

Formúlu 1 mót verður í Malasíu um helgina og búist er við 40 stiga hita og miklum raka. Þetta mun reyna mikið á þolgæði bíla og ökumanna sem kepptu í Ástralíu um síðustu helgi.

McLaren náði góðu forskoti í stigakeppni bílasmiða, en Lewis Hamilton á McLaren vann mótið í Ástralíu, en Nick Heidfeld á BMW varð annar og Nico Rosberg þriðji. Farþegaflugvél var einmitt máluð í litum sem Rosberg notar á hjálm sinn á dögunum og skírð í höfuðið á Sir Frank Williams.

Ferrari lenti í miklum vanda í Ástralíu og þurfti að senda keppnisvélar sínar til athugunar til Ítalíu. Í ljós kom að vélarnar höfðu skemmst og fær Ferrari liðið nýjar vélar í Malasíu, en refsilaust þar sem bílarnir biluðu í Melbourne. Að öllu jöfnu tapa ökumenn 10 sætum á ráslínu, ef vél bilar um mótshelgi.

Að sama skapi verða gírkassar að endast fjögur mót, en gera má lítilsháttar breytinar á gírkassa á milli móta. Ef skipta þarf um gírkassa milli móta, þá tapa ökumenn fimm sætum á ráslínu.

Bein útsending verður frá öllum æfingum, tímatöku og keppni í Malasíu á Stöð 2 Sport. Þær eru meira og minna að næturlagi, og hefjast á aðfaranótt föstudags en endursýningar eru að degi til. Vert er að geta þess að aðeins bein útsending frá tímatöku og kappakstri er í opinni dagskrá. Allir þættir um Formúlu 1 og endursýningar frá tímatöku og kappakstri eru í lokaðri dagskrá á Stöð 2 Sport.