Stærstu bönkum Sviss komið til bjargar

Svissneska ríkisstjórnin og fjárfestar munu leggja milljarða franka inn í tvo stærstu banka landsins til þess að bjarga þeim frá hruni. Um er að ræða bankana UBS og Credit Suisse.

Ríkisstjórnin mun leggja stærsta bankanum, UBS, til um sex milljarða franka, jafnvirði um 600 milljarða króna, og hefur bankinn einnig samið við Seðlabanka Sviss um að flytja ýmsar verðlitlar eignir í sérstakan sjóð.

Þá munu forsvarsmenn Credit Suisse afla aukins hlutafjár hjá fjárfestum, þar á meðal í Katar. Talið er að bankinn þurfi um þúsund milljarða króna. Bankarnir tveir fara ekki varhluta af þeirri fjármálakreppu sem ríkir frekar en önnur fjármálafyrirtæki og reyndist tap Credit Suisse ríflega 100 milljarðar á þriðja ársfjórðungi.