Sviss finnur fyrir sama sársaukanum og Ísland

Sviss finnur fyrir sama sársaukanum og Ísland þessa daganna. Að vísu hefur þessi háborg fjármála heimsins ekki hrunið en tapið af bankastarfsemi landsins er gríðarlegt og fer versnandi.

Svipað og Ísland er Sviss utan Evrópusambandsins og þjóðin mjög stolt af sjálfstæði sínu. En Svisslendingar velta því fyrir sér þessa dagana hvort þeir séu í rauninni ónæmir fyrir sömu örlögum og Íslendingar.

Í umfjöllun um málið á Bloomberg-fréttveitunni kemur fram að þótt Sviss sé við betri heilsu en Ísland þessa daganna byggist efnahagslíf landsins að mestu á bankakerfi þess og vetraríþróttum. Og bankakerfið hefur ekki farið varhluta af fjármálakreppunni sem ríkir í heiminum þessa stundina.

Markaðsvísitala Sviss hefur lækkað um 31% á árinu og sumir af bönkunum sem hafa heimilisfang við Bahnhofstrasse í Zurich hafa tapað ævintýralegum upphæðum. Nefna má að UBS AG, flaggskipið í bankaflota Sviss, tapaði mestu allra banka í Evrópu á þessu ári. Seðlabanki Sviss neyddist til að aðstoða UBS með lánum og fyrirgreiðslu að stærðargráðunni yfir 8.000 milljarða kr.

Margir svissneskir bankamenn og fjölskyldur bregðast við þessu með því að flytja á brott. Bloomberg greinir frá einum slíkum, Michale Baer, afkomenda þekktustu bankafjölskyldu landsins. Baer tók sig til og flutti sína eigin bankastarfsemi alfarið til Dubai árið 2006.

Efnahagslíf Íslands mun skreppa saman um 10% á næsta ári sökum hruns bankakerfisins og afleiðingum þess. OECD reiknar með að efnahagur Sviss minnki um 0,2% á sama tíma. Það er kannski ekki mikill samdráttur m.v. það sem er að gerast í heiminum. En fyrir Svisslendingar sem ekki eru vanir öðru en stöðugum, en þó hægum hagvexti, eru þetta ekki góðar fréttir.