Bakkavör í samningum við 17 banka með aðstoð Rothschild

Bakkavör á nú í samningum um sambankalán hjá 17 bönkum og nýtur til þess ráðgjafar frá Rothschild fjárfestingarbankanum. Að sögn Financial Times eru samningar þessir tilkomnir vegna þess að innistæða Bakkavarar upp á 150 milljón pund, eða um 26 milljarða kr., brann inni í gamla Kaupþingi er bankinn hrundi.

Samkvæmt FT gerir þessi frosna innistæða hjá gamla Kaupþing það að verkum að Bakkavör er í hættu með að brjóta gegn tæknilegum atriði í samningi þeirra um sambankalánið.

FT tekur fram að rekstur Bakkavarar sé traustur og félagið glími ekki við lausafjárskort. Hinsvegar hafi íslensk stjórnvöld bannað alla fjármagnsflutninga í gjaldeyri frá Íslandi og því geti Bakkavör ekki flutt þessa inneign sína yfir til Bretlands.

FT hefur eftir talsmanni Bakkavarar að fyrrgreind inneign sé tryggð af Tryggingssjóði innistæðueigenda. Hinsvegar fékkst ekki yfirlýsing frá Rothschild um málið.

Rekstur Bakkavarar skilaði tapi á þriðja ársfjórðungi en félagið er byrgir fyrir m.a. Tesco og Marks & Spencer.