Bandaríkjastjórn berst gegn kreppunni

Bandarísk stjórnvöld ætla að tefla fram enn einni aðgerðinni til að vinna bug á kreppuástandinu á fjármálamarkaði.

Niðurstaða fundar fulltrúa Bandaríkjaþings, fjármálaráðherra landsins og seðlabankastjóra í gærkvöldi var sú að stofna sérstakan sjóð til að kaupa undirmálslán af bankakerfinu. það eru húsnæðislán sem veitt hafa verið einstaklingum með litla greiðslugetu eða litlar sem engar eignir á bak við sig. Ráðgert er að ljúka við áætlunina um helgina og í næstu viku fjallar þingið um þær lagabreytingar sem kunna að verða nauðsynlegar.